Ministrja e Arsimit, Besa Shahini nuk do të jetë më pjesë e qeverisë përtej këtij mandati.
Këtë e bëri vetë të ditur vetë ministrja në një intervistë për Euronews. Shahini theksoi se këtë vendim ia ka komunikuar edhe kryeministrit Rama.
“Unë tashmë kam njoftuar dhe kryeministrin Rama dhe kam marrë një vendim se nuk do të vazhdoj të qëndroj në Shqipëri përtej këtij mandati. Jeta ime është e paqëndrueshme në Shqipëri pasi familja ime jeton në Kosovë. Në këto momente kur ka probleme nga këto siç jemi ballafaquar është pak e vështirë. Por, i kam thënë se jam në dispozicion që të shërbej, por nuk do të përfshihem në fushatë elektorale”, tha ajo.
Shahini u emërua ministre Arsimi në dhjetor të vitit 2018, pas protestave të studentëve që cuan në largimin e Lindita Nikollës nga posti. Zërat për largimin e saj qarkullonin prej disa kohësh, teksa Shahini i konsideron ato si të “shëndetshme”.
“Mendoj se këto janë diskutime janë normale kur jemi futur zyrtarisht në një vit parazgjedhor dhe këtu reflekton të gjithë vullnetin dhe ambicien brenda partisë. Dhe mendoj se kjo është shumë e shëndetshme”, shtoi ajo.
