Ish-kryeministri Sali Berisha ka ironizuar me shifrat që vijnë nga Forumi Ekonomik Botëror, të cilat e rendisin Shqipërinë të parafundit për mundësitë e punësimit.
“Shqipëria nënkampione, pra e parafundit në botë në mundësinë e punësimit!
Miq, rënies së rrufeshme me 110 vende me poshtë e mbrojtje të investimeve të huaja, vjen goditja e dytë më e rënda për Shqipërinë! Kjo goditje vjen nga Forumi Ekonomik Botëror (WEF) i cili e renditi Shqipërinë të parafundit për mundësitë e punësimit në raportin botëror të lëvizshmërisë sociale 2020.
Në këtë raport për mundësi të punësimit Shqipëria u vlerësua vetëm me 32.5 pikë duke u pozicionuar në vendin e parafundit (vendi 81 nga 82 shtete).
Në raport thuhet se rreth 19% e atyre që kanë diploma janë të papunë, së bashku me 20.4% të atyre me arsim të mesëm dhe 13.8% të atyre me arsim bazë. Këto tregues shprehin qartë se ata me arsim më të lartë kanë më shumë gjasa të jenë të papunë, çka kontribuon në situatën e “rrjedhjes së trurit” – emigrimit.
Mjerisht, mbi gjysma e punëtorëve janë në punësim të cenueshëm dhe rrezikojnë të humbasin punën e tyre”, shkruan Berisha në rrjetin social Facebook.
