Ministrja e Shëndetësisë Ogerta Manastirliu në një konferencë të përbashkët me kryeministrin Edi Rama njoftoi se në vendin tonë numri i të infektuarve me koronavirus është rritur, duke shkuar në 15.
“Deri tani janë testuar 238 persona, 15 prej tyre kanë rezultuar pozitivë. 3 rastet e reja janë të lidhura me pacientin 0”, deklaroi Manastirliu.
Kjo e fundit ka dhënë edhe lajmin e mirë se 84 mjekë në spitalin e Durrësit, që është kthyer në karantinë, kanë rezultuar të painfektuar me koronavirus.
“Në kampionin e parë të testimeve që kemi realizuar në Durrës te mjekët dhe infermierët, të gjithë testimet janë negative. Mjekët dhe infermierët kanë punuar me të gjitha protokollet e mbrojtjes personale. Po bëhet punë e madhe për hetimin epidemiologjik për të vlerësuar rastet në kohë”, pohoi ajo.
Në vijim, ministrja iu përgjigj akuzave të kryetarit të PD-së Lulzim Basha.
Ajo tha se “24 orët e fundit janë 3 fakte që hedhin poshtë akuzat e Lulzim Bashës: maskat, spitali i Durrësit dhe pajisjet e mbrojtjes personale”.
“Nuk do të merrem më me Lulzim Bashën sepse në këtë moment krize kemi vendosur të merremi me armikun, koronavirusin”, u shpreh Manastirliu.
