Pas përfundimit të mbledhjes së qeverisë, ministrja e Shëndetësisë Ogerta Manastirliu njoftoi se prej 1 korrikut është rritur rroga e mjekëve dhe infermierëve. Vendimi është marrë nga Këshilli i Ministrave, dhe aplikimi i rritjes së pagës ka nisur që nga data 1 korrik.
Duke u ndalur në shifrat, ajo tha se efekti vjetor i rritjes së pagave për masën 6% është rreth 10 mln dollarë, dhe nga kjo rritje përfitojnë rreth 19 mijë mjekë, infermierë dhe profesionistë shëndetësorë që ofrojnë shërbime në sistemin tonë shëndetësor.
“Duke filluar nga data 1 korrik, ashtu sikurse e kemi premtuar, për të gjithë mjekët, infermierët, të gjithë profesionistët e shëndetësisë, paga e tyre rritet me 6%. Kjo është një politikë e qeverisë shqiptare, e cila sikurse është planifikuar hyn në fuqi në 1 korrik dhe shtyn efektet përgjatë gjithë vitit dhe në vazhdim. Efekti vjetor i rritjes së pagave për masën 6% është rreth 10 mln dollarë, dhe nga kjo rritje përfitojnë rreth 19 mijë mjekë, infermierë dhe profesionistë shëndetësorë që ofrojnë shërbime në sistemin tonë shëndetësor”.
Ministrja bëri të ditur se do të ketë edhe një shpërblim financiar për mjekët që punojnë në spitalet jashtë vendbanimeve të tyre.
“Nga ana tjetër kemi vendosur dhe qeveria shqiptare ka miratuar edhe një dëmshpërblim financiar në masën 15 mijë lekë në muaj, për të gjithë ata mjekë të cilët përfundojnë specializimin dhe në bazë të kontratave me Ministrinë e Shëndetësisë ushtrojnë profesionin jashtë vendbanimit, do përfitojnë këtë shpërblim financiar”.
