Mbrëmjen e kaluar u rrëzua Qeveria Kurti, si pasojë e mocionit të mosbesimit të propozuar nga kreu i LDK-së Isa Mustafa.
Ndërkohë reagimet kanë qenë të shumta nga aktorët politikë si dhe nga opinioni publik në përgjithësi.
Po ashtu ka reaguar edhe Presidenti i Kosovës Hashim Thaçi.
Ai ka deklaruar se do të ftojë në një konsultim liderët e të gjitha partive politike për të shikuar mundësinë e krijimit të qeverisë së re të vendit.
Këtë deklaratë, Presidenti Thaçi e bëri në një dalje për mediat e Kosovës ndërsa shtoi se si president i vendit do të respektojë Kushtetutën dhe ligjet e Kosovës.
“Pas rënies së qeverisë si president i vendit pa humbur kohë do të filloj konsultimet me liderët e të gjitha partive parlamentare për të shikuar mundësinë e krijimit të qeverisë të re të stabilitetit, unitetit dhe të gjithë përfshirjes. Në çdo hap timin, si presidenti vendit, do e respektoj në plotëni Kushtetutën dhe ligjet e vendit”, tha Thaçi.
Kujtojmë se Kreu i LDK-së, Isa Mustafa ka paralajmëruar se do të kërkojë bashkëpunim me AAK-në, Nismën dhe minoritetet si dhe ka përjashtuar mundësinë e bashkëpunimit me PDK-në.
Nga ana tjetër Albin Kurti është shprehur se për momentin do të shërbejë si kryeministër në detyrë dhe se partia e tij do të qeverisë e vetme pas zgjedhjeve të ardhshme.
