Policia ka zbardhur disa detaje nga ulja e avionit privat në zonën e Vermoshit, në Malësi të Madhe. Brenda avionit kanë qenë dy persona të cilët kanë arritur të shpëtojnë. Menjëherë pas uljes, piloti tentoi të fluturojë sërish por nuk ia kanë dalë, ndaj u detyruan të largohen. Disa banorë të zonës kanë tentuar të afrohen, por që ata nuk i kanë lejuar. Në vendngjarje ka mbërritur dhe një automjet tip “Fuoristradë” që i ka marrë dy personat dhe janë larguar. Nuk dihet nëse ata janë turistë, apo ngjarja lidhet me situatën e trafikut të kanabisit në vend. Burime për “ABC” bëjnë të ditur se rreth orës 09:00 të mëngjesit, mjeti fluturues është pikasur nga barinjtë në Velipojën e Vermoshit. Pas një ore, piloti ka tentuar të grihet në ajër, por është përplasur me disa pemë.
“Disa minuta më vonë, në vendin e ngjarjes ka ardhur një fuoristradë dhe ka marrë dy personat që ndodheshin në aeroplan. Këta në makinë nuk lejuan që banorët e fshatit të afroheshin”. Kështu është shprehur kryeplaku i Kelmendit, Prek Vata.
Njoftimi i policisë:
Policia e Shkodrës ka reaguar për rrëzimin e avionit në zonën e Vermoshit, mesditën e sotme. Sipas policisë, rreth orës 12:30, është marrë informacion se në zonën e Vermoshit, në kufirin ndarës ndërmjet Shqipërisë dhe Malit të Zi është rrëzuar një avion i vogël.
Uniformat blu janë të rezervuara me detajet lidhur me këtë ngjarje. “Më datë 04.10.2021, rreth orës 12:30, është marrë informacion se në zonën e Vermoshit, në kufirin ndarës ndërmjet Shqipërisë dhe Malit të Zi (vendi i papërcaktuar) është rrëzuar një avion i vogël. Menjëherë janë nisur shërbimet nga DVP Shkodër dhe Komisariati i Policisë Malësi e Madhe, së bashku me Policinë Kufitare për verifikimin e rastit”, njofton policia.
