Gjatë komunikimit që zhvilloi me Komitetin e Ekspertëve turq për pandeminë e COVID-19, kryeministri Edi Rama tha se efektivi i plagosur në protestë, ia ka dalë mbanë në operacionin që ka kryer në Turqi.
Rama nuk harroi ndihmën për efektivin e plagosur në protestë, i cili rrezikonte të humbiste syrin, teksa dy ditë më parë u transportua në Turqi për ndërhyrje kirurgjikale. Efektivi mbeti i plagosur në protestat e dhunshme që u zhvilluan për vrasjen e 25-vjeçarit Klodian Rasha.
“Falenderues për mjekët që kanë trajtuar një efektiv policie, që pati një plagosje në protestë, faktikisht rrezikoi të humbte masën e syrit.
Pas operacionit të parë dhe vetë familja dhe ne kërkuam që të shkonte në Turqi, për një ndërhyrje të specializuar, një transplant të kornesë së syrit për të cilin kemi marrë para pak lajmin se ka dalë me sukses.
Falenderim të veçantë dhe ambasadorit që ishte në dispozicion pa orar për të realizuar transportimin e tij në kohë rekord. Arsye për t’u gëzuar sot pasi gjendja e djalit ishte jo e lehtë dhe operacioni i dytë nuk ishte diçka e garantuar.
Për këtë arsye u desh që të shkonte në atë spital, ku me sa duket ka dalë me sukses dhe kjo është diçka e gëzuar për familjen, prindërit, kështu që faleminderit dhe njëherë për këtë”, tha Rama.
