Ish-deputeti i Partisë Demokratike, Klevis Balliu, ka dalë haptazi kundër vendimit të kryedemokratit Basha, për përjashtimin e Sali Berishës nga grupi parlamentar. Me anë të një shkrimi në rrjetet sociale, ai thotë se vendimi ishte i gabuar, e se do i kushtojë shumë opozitarizmit në vend.
Balliu shprehet se Berisha ka qenë, është dhe do të mbetet zëri më i fuqishëm opozitar me denoncimet e tij që nga avionët e drogës, e deri tek kapja e shtetit. Sipas tij, asnjë fitore e PD nuk mund të quhet e tillë, nëse ajo vjen duke shkelur të drejtat e demokratëve e aq më tepër të liderit historik të saj.
Dje, kryedemokrati Basha tha se ndjen keqardhje që tezat e armikut të tij, Edi Rama, i dëgjoi të artikuluara nga goja e Sali Berishës, personit që ai ka konsideratë dhe vlerësim. Në këtë kontekst, Basha ripërsëriti se është detyruar që të marrë vendimin e përjashtimit të Berishës nga grupi parlamentar i PD, ndërsa shtoi se koha është ilaçi më i mirë, duke shpresuar se marrëdhëniet e tij me ‘doktorin’ do të rregullohen në një të ardhme.
Statusi
Përjashtimi i Sali Berishës
Përjashtim i simbolit të opozitarizmit
Vendimi për përjashtimin e Sali Berishës është një vendim i gabuar që nuk i kushton vetëm Partisë Demokratike por i kushton shumë opozitarizmit në Shqipëri. Nuk merren vendime të momentit për politikanë të gjithëkohshëm.
Ai ka qenë, është dhe do të mbetet zëri më i fuqishëm opozitar me denoncimet e tij që nga avionët e drogës e deri tek kapja e shtetit.
I gjithë lidershipi i Partisë Demokratike ishte kokëulur në selinë e PD përballë simpatizantëve demokratë. Asnjë fitore e PD nuk mund të quhet e tillë nëse ajo vjen duke shkelur të drejtat e demokratëve e aq më tepër të liderit historik të saj.
Armiku dhe përballja është dhe duhet të jetë me Edvin Kristaq Ramën, njeriu i cili ka vjedhur shtetin, ka shkatërruar demokracinë, ka vjedhur shqiptarët dhe ka tradhëtuar Shqipërinë duke cënuar interesat tona kombëtare.
