Rinisja e futbollit/ Pipero vjen me propozimin si të zhvillohen ndeshjet

Mjeku infeksionist Pëllumb Pipero, ka folur për mundësinë e rinisjes së aktiviteteve sportive në vend dhe të futbollit në veçanti. Në një intervistë për “RTSH Sport”, Pipero tha se është e mundur që të mbahen ndeshjet, por duhet të respetohen një sërë masash. Mjeku Pipero sqaroi më tej se nëse do të lejohet aktiviteti, duhet të respektohet distancimi social, pasi lojtarët mund të infektojnë pjesën tjetër të familjes.

“Është një pyetje e vështirë, por është një pyetje që duhet të marrë përgjigje nga epideomologët. Mendoj që nëse gjatë stërvitjes ka mundësi të respektohet distanca fizike, dhe kjo mund të bëhet gjatë stërvitjeve.

Për ndeshjet, më duket pak më e vështirë për ta realizuar. Të gjitha masat që mund të merren si bërja e tamponëve, nuk na siguron që jemi 100% të painfektuar. Unë si mjek mund të thoja që po, mund të lejojmë stërvitjen edhe ndeshjet, por janë një sërë masash që duhen marrë.

E kemi thënë shumë herë që mosha e re mund të preket, dhe të mos të ketë simptoma. Do të thoja që nëse do të lejohet aktiviteti, duhet të respektojnë distancimin social, pasi mund të infektojnë pjesën tjetër të familjes.

Nuk jam dakord që sportet e tjera në ambient të mbyllur të hapen, pasi është ndryshe futbolli që luhet në një ambient të hapur. Mendoj se lojtarët mund ta përballojnë nga ana fizike. Po përse mund të mos reduktohet koha e lojës e të zhvillohen dy pjesë nga 20 minuta”, përfundoi Pipero.