E kemi kaluar pikun? Pipero jep lajmin e shumëpritur

Pikun e pandemisë e kemi kaluar prej 2-3 javësh. Këtë e ka konfirmuar mbrëmjen e sotme mjeku infeksionit Pëllumb Pipero. I ftuar në emisionin “Arena”, Pipero tha se situata e koronavirusit në vendin tonë, është nën kontroll. Ai tha se pandemia ka një ecuri të butë dhe të menaxhueshme. Mjeku qetësoi shqiptarët se të gjithë treguesit rikonfirmojnë, se ecuria e epidemisë është nën kontroll.

“Pandemia tek ne ka pasur dhe ka një ecuri të butë, totalisht të kontrollueshme dhe të menaxhueshme. E kësisoj na lejon të jemi optimist, për të mundësuar hapjen graduale të vendit”.

Janë mbi 700 të infektuar. A nuk është e frikshme që këta njerëz do të vazhdojnë të infektojnë të tjerë?

“Jo të gjithë janë pozitiv aktive. Ata që janë pozitiv, janë shumë herë më pak të rrezikshëm, sesa një që është pozitiv dhe nuk e di. Sepse ai mund t’ua transmetojë të tjerëve. Nga 700 e ca raste, më shumë se 400 e ca janë shëruar tanimë. Kjo lloj shifre nuk na tremb. Kjo shifër na dëshmon që virusi është këtu. Masat janë adekuade, strategjia është adekuade. E kemi kaluar prej 2-3 javësh pikun e epidemisë. Sipas studiuesve, piku është kur numri i rasteve pozitive, shkon paralelisht me numrin e të shtruarve në spitale. Të gjithë treguesit rikonfirmojnë, se ecuria e epidemisë është nën kontroll, e menaxhuar, edhe referuar masave të qeverisë, dhe respektimit të rregullave të qytetarëve, dhe me këmbënguljen tonë”.