Pas disa ditësh qetësie, rikthehen lëkundjet e tërmetit në vend. Një tjetër tërmet është ndjerë pas mesnatës në fshatin Shetaj të Durrësit.
Sipas qendrës evropiane të tërmeteve (CSEM), lëkundja ka qenë me magnitudë 4.5 të shkallës Rihter dhe është regjistruar në orën 00:14.
Por ky nuk ka qenë i vetmi. Vetëm pak minuta më vonë, në orën 00:34 një tjetër lëkundje më e lehtë se e mëparshmja u ndje në Durrës. Tërmeti ishte me magnitudë 3 të shkallës Rihter, me një thellësi 29 kilometër.
Sipas sizmologëve këto lëkundje vijnë si pasgoditje të tërmetit të fuqishëm të 26 nëntorit, i cili shkaktoi 51 viktima. Ato kanë bërë me dije se këto lëkundje janë normale dhe se do vijojnë të ndodhin për një periudhë të pacaktuar kohe. Sizmologë të ndryshëm kanë bërë me dije se qytetarët nuk duhet të panikosen, pasi lëkundjet në vijim do jenë më të vogla.
