Çmimi Nobel, është më prestigjiozi që mund t’i jepet ekspertëve në fushën e Kimisë, Fizikës, Letërsisë, Mjekësisë dhe Paqes. Disa personalitete me origjinë shqiptare si Nënë Tereza dhe Ferid Muradi, e kanë fituar tashmë atë. Shkrimtari ynë i njohur Ismail Kadare, ka qenë rregullisht pretendent 3 dekadat e fundit për fitimin e këtij çmimi, pa mundur ende të marrë atë.
Megjithatë në historinë e këtij çmimi, ka shumë personalitete të tjera, që janë nominuar dhjetëra here, pa mundur ta fitojnë asnjëherë këtë çmim. Rekordin në këtë drejtim, e mban mjeku francez Gaston Ramon, me plot 155 nominime për Çmimin Nobel në Mjekësi, midis viteve 1930-1953. Ai prodhoi në vitet 1920, një vaksinë kundër sëmundjes së difterisë, që asokohe shkaktonte miliona të vdekur çdo vit. Pas tij vjen mjeku tjetër francez, Emil Rua, me 115 nominime midis viteve 1901-1932. Edhe Rua, kërkoi gjetjen e kurës për difterinë.
Pas tyre, vjen fizikanti dhe matematikani gjerman Arnold Somerfeld me 84 nominime. Ndërsa ai nuk e fitoi kurrë çmimin e famshëm, ishte autor i shumë studimeve të vlerësuara në fushën e mekanikës kuantike dhe hidrodinamikës. Shumë nga studentët e tij si Peter Debje, Volfgang Pauli, Hans Bet, Verner Hajzenberg etj, fitues të çmimit Nobel, e cilësuan profesorin e tyre si frymëzim dhe mbështetje për suksesin e arritur. Pra jo gjithmonë ndodh që fituesi rrëmben gjithçka. Merita kanë edhe personalitetet, mbi supet e të cilëve qëndruan dhe u ngritën, emrat më të mëdhenj të shkencës. /TIRANA TODAY
