Kryetarja e LSI-së, Monika Kryemadhi shprehet se ndan të njëjtin qëndrim si kryetari i PD-së, Lulzim Basha, për vijimin e reformës zgjedhore.
Përmes një postimi në Facebook, Kryemadhi thekson se Basha ka folur në emër të Opozitës së Bashkuar.
Sipas saj, shembja e Teatrit ishte një provokim nga kryeministri Rama që opozita të largohej nga tryeza e reformës zgjedhore. Ajo sqaron se opozita është e vendosur që të realizohet reforma zgjedhore dhe që kreu i qeverisë të largohet nga pushteti.
Postimi i plotë:
LSI nuk ka asnjë qëndrim të ndryshëm nga qëndrimi që ka bërë të njohur në emër të Opozitës së Bashkuar kryetari i PD-së zoti Lulzim Basha.
Përmbushja e të gjitha detyrimeve ndaj reformës zgjedhore ka qenë dhe mbetet prioriteti im si Kryetare e LSI-së, ndaj do të vazhdoj të bëj të gjithë presionin e nevojshëm, që ajo të realizohet me konsensus dhe sa më parë, si kusht i rëndësishëm për të rikthyer legjitimitetin e vullnetit të qytetarëve shqiptarë.
Shembja e paligjshme e Teatrit Kombëtar dhe përdorimi i dhunës policore mbi artistët, mbi gazetarët, mbi veprimtarët e shoqërisë civile dhe përfaqësuesit e opozitës, është provokimi i rradhës së Edi Ramës ndaj opozitës dhe qytetarëve shqiptarë, i cili edhe në sallën e Kuvendit vazhdoi me të njejtën gjuhë fyese dhe provokative, për të na detyruar të largohemi nga tryeza e reformës zgjedhore.
Por pavarësisht dhunës policore, pavarësisht gjuhës fyese, provokuese dhe urrejtjes së Edi Ramës, e ritheksoj edhe një herë se ne jemi të vendosur të realizojmë reformën zgjedhore dhe largimin përfundimtar të tij nga pushteti, si kusht për rikthimin e demokracisë në vend.
