Sekretari i Përgjithshëm i Partisë Demokratike, Gazmend Bardhi, përmes llogarisë së tij në ‘Twitter’ ka reaguar lidhur me raportin e Departamentit Amerikan të Shtetit për blerjen e votave.
Sipas Bardhit, DASH ka konfirmuar blerjen e votave në zgjedhjet parlamentare të vitit 2017, dhe askush nuk është ndëshkuar.
“Raporti i Departamentit Amerikan të Shtetit konfirmon blerjen e votave në 2017 dhe nivelin e lartë të korrupsionit të qeverisë së Edi Ramës. Askush nuk ndëshkohet! Kundër blerjes së votave, kundër pandëshkueshmërisë, kundër korrupsionit, shqiptarët do bashkohen më 16 Mars!”, shkruan Bardhi,
Kujtojme që Departamenti Amerikan i Shtetit publikoi dje raportin vjetor mbi të drejtat e njeriut në botë. Në pjesën për Shqipërinë trajtohen një numër çështjesh, por deklarata më e fortë lidhet me zgjedhjet e vitit 2017.
Sipas raportit, gjatë zgjedhjeve parlamentare të qershorit 2017 ka patur shit-blerje votash dhe presion ndaj votuesve.
