Këpurdha e dëmtuar nga prostesta e opozitës një vit më parë, e vendosur në kopshtin e selisë së qeverisë, është rivendosur përsëri në vendin që ishte.
Kryeministri Rama njofton me anë të një postimi në Instagram, se këpurdha është rikthyer dhe është 1 metër më e lartë se ç’ishte.
Ai shkruan me ironi se karakteristika e kësaj këpurdhe është se kur goditet, rritet. E për rrjedhojë, kush e sulmon, këpurdha vetëm lartësohet.
“Pas shkatërrimit të saj nga molotovarët e pranverës së shkuar, KËPURDHA e artisit të mirënjohur bashkëkohor Carsten Holler, dhuruar prej tij nga cikli i koleksionit të famshëm të disa muzeve prestigjozë të botës, është rikthyer në vendin e vet 1 m më e lartë se ç’ishte.
*karakteristika e kësaj këpurdhe është se kur goditet rritet, kështu që kush e sulmon duhet ta mësojë se vetëm e lartëson”, shkruan kreu i qeverisë.
Kujtojmë këtu se protestuesit e thirrur nga opozita në tubim, i vendosën flakën hyrjes së Kryeministrisë disa herë. Ata shkatërruan edhe instalacionet, mes tyre “Kërpudha Gjigante me Tri Pjesë”, e vendosur në kopshtin e selisë së qeverisë, që ishte një vepër arti dhuruar nga autori Carsten Holler.
