Kryeministri Edi Rama deklaroi se Shqipëria dhe Kosova janë një, duke i kthyer përgjigje presidentit serb Aleksandër Vuçiç, i cili publikoi hartën e Kosovës me flamurin e Serbisë.
Nga Kukësi, ku ndoqi nga afër procesin e vaksinimit të mjekëve nga Kosova, Rama u shpreh se vaksinimi ndodhi një ditë pas pubikimit të hartës, dhe se Vuçiç luan në Facebook.
Ndër të tjera, Rama tha se vaksinimi i mjekëve po bëhet në Kukës, për shkak se kompania nuk i lejon që të dërgojnë vaksina jashtë territorit.
Edi Rama: “Mirë se keni ardhur dhe më vjen shumë mirë. Ne kemi filluar me 500. Në fakt Blerimi më mori në telefon më tha t’i bëjmë 200. I thashë sa duhen, 500. Ne nuk do t’u lëmë në asnjë mënyrë vetëm atje sepse në fund të fundit jemi një. Edhe fakti që bëhet në Kukës lidhet me atë që kompanitë nuk lejojnë nxjerrjen e dozave jashtë. Kukësi është dhe i Shqipërisë dhe i Kosovës. Qëlloi të nesërmen e asaj hartës së leshit, por është më mirë kështu. Ai shoku në Beograd le të publikojë harta dhe të lozë në facebook, ne jemi një dhe kështu do vazhdojmë deri në fund. Me shëndet”.
