Kryeministri Edi Rama deklaroi nga foltorja e Kuvendit se duke filluar nga zgjedhjet e ardhshme, vota e emigrantëve do të përfshihet në Kodin Zgjedhor, pavarësisht kundërshtimeve nga ana e opozitës jo parlamentare.
“85 % e popullit refuzoi Ramën – thonë të shkretët. Por i llogarisin të tërë, që nga të ikur në kohën e ambasadave, si prezentë në Shqipëri 30 qershorin e fundit. Janë këta që e pengojnë përfshirjen e emigrantëve në Kodin Zgjedhor. Theksoj bindjen tonë se emigrantët duhet ta kenë të drejtën e votës, duke filluar nga zgjedhjet e ardhshme. Uroj edhe me dakordësinë e opozitës parlamentare”, theksoi Rama.
Ndër të tjera, në fjalën e mbajtur gjatë seancës së veçantë plenare, ku po diskutohet ngritja e një komisioni hetimor për të hetuar shkeljet e presidentit Meta, kryeministri nuk hezitoi të hidhte akuza dhe sulme ndaj opozitës, ku theksoi se nuk ka asnjë shans rikthimi tek fitorja.
Ta lexosh si refuzim popullor pjesëmarrjen dhe ta shohësh rezultatin tonë si tkurrje elektorale e shumicës do të thotë të mos kuptosh se çfarë vjen më mbrapa. Qoftë zhvillimi i zgjedhjeve, qoftë rezultati ynë, qoftë verbëria e opozitës, e tregoi që sot pse ajo opozitë nuk ka asnjë shans rikthimi tek fitorja”, u shpreh kryeministri Rama.
Po ashtu, Rama u ndal dhe tek raporti i OSBE-ODHIR për zgjedhjet e 30 qershorit, teksa tha se mungesa e gjerë e besimit u shkaktua nga ndërhyrja e dhunshme e presidentit Meta me antidekretin e tij në mes të procesit zgjedhor.
“Ata thonë se raporti paraprak i OSBE ka konfirmuar pozicionet e opozitës protestuese dhe presidentit. Por në fakt ajo ka evidentuar një proces krejt anormal për shkak të shkeljes së kushtetutës nga ana e presidentit. Mungesa e gjerë e besimit të publikuar është një fakt i pakontestueshëm por është fakt se ka ardhur për shkak të ndërhyrjes së Ilir Metës në proces me anti dekretin e tij në proces. Politizimi i komisioneve është një fat i njohur botërisht. Kjo ishte hera e fundit që zgjedhjet administrohen nga partitë politike. Ne do depolitizojmë administratën zgjedhore”, shtoi Rama.
