Kryeministri Edi Rama ka pritur homologun e tij maqedonas, Zoran Zaev në qytetin e Pogradecit.
Në një konferencë për shtyp, kryeministri tha në hyrje të fjalës së tij se Pogradeci është simbolikë e bashkimit të dy shteteve, duke treguar kështu se përse u zgjodh ky qytet për mbledhjen e dy qeverive Shqipëri-Maqedoni.
Rama tha se Shqipëria ka qenë dhe do të jetë mikja më e mirë e Maqedonisë, ndërsa shprehu përkrahjen e tij për integrimin e Maqedonisë.
Po ashtu, kryeministri njoftoi krijimin e një pike të përbashkët kalimi në Qafë Thanë, ndërsa e cilësoi takimin e sotëm si një takim historik të marrëdhënieve mes dy shteteve.
FJALA E RAMËS:
Është kënaqësi t’ju uroj mirëseardhjen këtu në Pogradec, ku njerëzit e këtij vendi e lidhin këtë qytet me një nga poetët më të mëdhenj, Lasgush Poradeci. Pjesa më e madhe e vargut i kushtohet pikërisht këtij liqeni, ku në anën tjetër përkul siluetën e Ohrit, duke bashkuar dy vendet e shteteve tona. Ajo i përshtatet më së miri kësaj mbledhje të përbashkët të dy qeverive, me një shpresë se çel përparimin e marrëdhënieve të bashkëpunimit të dy vende.
Shqipëria ka qenë është dhe do të jetë mikja më e mirë e Maqedonisë. Të njëjtën qasje treguam edhe për gjërat që mbërthyen vendin, rrezikoi të kthehej në një konflikt ndëretnik me pasoja të rënda në të gjithë rajonin. Askush më shumë sesa ne nuk e ka përjetuar me entuziazëm mbylljen e një cikli të trazuar me Maqedoninë.
U ndjemë të inkurajuar nga lidershipi i Zaev, vlerësuam dhe mirëpritëm hapat konkrete. Përpos vizitave dhe takimeve dypalëshe, me kryeministrin Zaev kemi ndarë angazhimin për të kontribuar në ndryshimin e në qarkullimin e kapitalit pa barriera.
Ky takim i sotëm, moment kyç në historinë tonë të përbashkët, sot jemi këtu për të marrë një angazhim të përbashkët për të ngritur marrëdhëniet mes Shqipërisë dhe Maqedonisë në një stad tjetër cilësor.
Agjenda ka një qasje konkrete dhe synon rezultate. Detyrë të ofrojmë më shumë zhvillim, të punojmë për më shumë mirëqenie. Do angazhohemi në një lidhje më të mirë të infrastrukturës rrugore. Marrim përsipër harmonizimin për një tjetër projekt për Rrugën e Arbrit.
Do punojmë që të sigurojmë lëvizjen e lirë të mallrave, hapat e nevojshëm për të krijuar një pikë të përbashkët kalimi në Qafë Thanë. Duke pasur parasysh fluksin turistik, synojmë përkrahjen e nismave ligjore.
Ndajmë pasuri ujore të jashtëzakonshme. Është koha të rivlerësojmë qasjen e përbashkët për t’i mbrojtur këto pasuri, duke pasur parasysh impaktin e tyre në ekosistem. TIRANA TODAY
