Një familje që kishte ardhur me pushime nga Gjermania në Stamboll është helmuar, pasi kishte ngrënë midhje dhe “kumpir” (patate të mbushura) në Ortakoy, ndërsa dy fëmijët e tyre, 6 dhe 3 vjeç, kanë humbur jetën.
Sipas mediave turke, familja me katër anëtarë, Servet Bocek, Çigdem Bocek dhe fëmijët e tyre Kadir Muhammet (6 vjeç) dhe Masal (3 vjeç) kishin mbërritur në Stamboll më 9 nëntor nga Gjermania dhe ishin vendosur në një hotel në lagjen Fatih.
Më 11 nëntor, ata kishin ngrënë midhje nga një shitës ambulant dhe “kumpir” në një restorant në Ortakoy.
Të njëjtën ditë, familja filloi të shfaqte simptoma si të vjella dhe dhimbje barku, dhe më 12 nëntor u paraqitën në spital, ku morën trajtim me serum. Më pas, ata u lanë të ktheheshin në hotel.
Në orët e vona të natës, nëna Çigdem Bocek gjeti vajzën e saj 3-vjeçare Masal pa shenja jete. Menjëherë u njoftuan policia dhe ambulanca dhe e gjithë familja u dërgua në spital.
Dy fëmijët, Masal dhe Kadir Muhammet, nuk mundën të shpëtoheshin, pavarësisht përpjekjeve të mjekëve. Babai Servet Bocek është në gjendje të rëndë dhe i intubuar, ndërsa nëna ndodhet në kujdes intensiv.
Policia ka sekuestruar pamjet e kamerave të hotelit dhe ka marrë në pyetje katër dëshmitarë.
Drejtori i Shëndetësisë i Stambollit, Abdullah Emre Guner, në një deklaratë në rrjetin X, bëri me dije se është hapur një hetim për ngjarjen.
“Dy fëmijët, 6 dhe 3 vjeç, pavarësisht të gjitha përpjekjeve mjekësore, nuk kanë mundur të shpëtohen. Trajtimi i prindërve në kujdes intensiv vazhdon. Drejtoria jonë e Shëndetësisë ka nisur hetim për rastin”./Euronews/
