Në një takim të mbajtur mesditën e sotme me importues, eksportues dhe përfaqësues të zinxhirit të furnizimit me mallrat e shportës, kreu i qeverisë u tregua mjaft i prerë. Ai dha ultimatumin e fundit se nëse ka biznese që nuk deklarojnë pagat, nuk do të tolerohen nga njësia e hetimit tatimor, por do të goditen.
“Po shikonim gjithë pasqyrën e pagave dhe vetëm nga rishikimi i pagave si rezultat i kërkesës, i thirrjes për të nxjerrë në dritë më shumë nga paga, ne e dimë që pagat në Shqipëri në sektorin privat një pjesë janë në dritë një pjesë janë të padukshme. Ne kemi një rritje mesatare të pagës 90 mijë lekë. Ne do vazhdojmë ta kërkojmë këtë gjë.
Njësia që kemi ngritur ka hyrë në hetime. I bëj thirrje të gjithëve që në deklarimin e pagave të vënë pagën, sepse do të godasim pa asnjë tolerancë aty ku do kapim. Nëse del keq me pagat nga hetimi tatimor, pastaj do të shkojnë me prokurorinë.
Nuk mundet dot që ne të flasim për pensione të ulëta dhe ndërkohë të tolerohet që pensionet të goditen nga mospagimi i sigurimeve për pagën përkatëse”, u shpreh Rama.
