Pema e festave të fundvitit para kryeministrisë, u bë objekt vandalizimi nga protestuesit. Revoltën e tyre për vrasjen e 25-vjeçarit Rasha, e shkarkuan pikërisht te dritat e pemës, duke hequr një pjesë të tyre.
Por, nuk mjaftoi me kaq, pasi për shkaqe të paqarta bredhi shpërtheu në flakë dhe kaq mjaftoi që rrjeti i dritave të digjej i gjithi. Protesta para kryeministrisë vjen ndërsa shefi i qeverisë ndodhet në SHBA, për takime lidhur me sigurimin e vaksinës kundër Covid.
Ndërkohë, Bora Rasha, motra e Klodian Rashës, kërkoi drejtësi për vëllanë. Ajo tha se në momentin që ndodhi ngjarja ka qenë në Itali, ndërsa erdhi sot për ta përcjellë për në banesën e fundit. Nga protesta përpara Kryeministrisë, ajo deklaroi se vëllai ishte me shokët deri në orën 11:30, dhe më pas kishte shkuar të merrte një paketë, por u vra.
Klodian Rasha, 25-vjeç është ekzekutuar me dy plumba këtë të martë, 8 dhjetor, nga një efektiv policie. Ngjarja ka ndodhur në Laprakë të kryeqytetit, pasi i riu kishte dalë orët e para të mëngjesit jashtë banesës së tij.
Policia shprehet se i riu ka kërcënuar efektivin e policisë, ndaj ai ka qëlluar në kushtet e vetëmbrojtjes dhe në errësirë. Por ndryshe thonë familjarët dhe fqinjët të cilët shprehen se rruga është me ndriçim dhe i riu nuk mbante asnjëherë armë me vete.
