Përgjatë një interviste për “News 24” kryeministri Edi Rama iu përgjigj thirrjes së kryetarit të PD-së Lulzim Basha për të shpallur gjendjen e fatkeqësisë natyrore.
Rama deklaroi: “Është ajo thirrja që vjen gjithmonë në të gjitha herët dhe për të gjitha rastet, por siç ndodhi dhe me tërmetin, apo herët e tjera. Ne e dimë shumë mirë punën tonë dhe do ishim shumë të lumtur të na vinte ndonjë thirrje që na ndihmon, jo thirrje që na pengon”.
Pyetjes “Si do të përballohet situata, për personat që nuk kanë marrë bonusin e qirasë?”, kreu i qeverisë iu përgjigj: “Nuk ka asnjë problem, askush nuk i lëviz ata nga shtëpia dhe asnjë qiradhënësi nuk do t’i mungojë qiraja”.
Si do të vijohet, a do ketë shtim të numrit të analizave?
Rama: “Siç e kemi menduar, kjo është diçka që i takon ekspertëve dhe unë i mbështes. Ne do vazhdojmë punën, mbështetur tek Komiteti i Ekspertëve”.
A është konsideruar mbyllja e fasoneve dhe call center-eve, si do të veprohet?
Rama: “Përgjigjja është që në vende ku disiplina e centralizuar e një aktiviteti është e mundur mjafton që njerëzit të respektojnë rregullat, të mbajnë distancë. Kemi parë që janë reduktuar vendet e punës në një hapësirë për të krijuar më shumë distanca. Njerëzit nuk duhet t’i japin dorën njëri-tjetrit, të zbatojnë rregullat dhe nuk ka asnjë problem. Virusi nuk shpërndahet në ajër, por nga kontakti”.
