Deputetja Rudina Hajdari ka kritikuar mungesën e kryeministrit Rama në Kuvend, teksa u shpreh se duhet të ishte prezent për të thënë diçka mbi progres-raportin e Komisionit të Europës.
Sipas saj, qeveria është në regres dhe aspak në progres, ndërsa akuzon Ramën se bën ligje që, sipas saj varfëron të varfrit dhe pasuron të pasurit.
“Në sallë mungon sërish kryeministri që duhet të jetë prezent për të shënuar këtë ditë duke na thënë diçka sa i përket raportit.
Kam ardhur për të thënë disa të vërteta, kritika që janë me vend dhe populli duhet ti dëgjojë. Ne kemi vetëm një njeri që u tregon atyre se është më i miri i të mirëve dhe si ai nuk ka.
Ka 6 vite që me fjalë shumë e vepra pak po bind ata që kanë vesh të dëgjojnë se vetëm ky po ndërton një vend ku mbizotëron ligji dhe shteti, ndërkohë që merr çdo vendim brenda e jashtë parlamentit dhe vendit.
Ky njeri që bën ligje në kurrizin tonë, të së mirës së askujt, varfëron të varfrit dhe pasuron të pasurit, sillet në Evropë me reforma të paimplementuara dhe bën tangon e Serbisë ndihet më i frikësuar se kurrë nga partia e tij.
Duhet të dijë dy gjëra, që qeveria është në regres dhe jo progres dhe integrimi nuk mund të vijë dot kurrë nga të paintegruarit, asnjë nga liderët tanë nuk e bind BE se do bëjnë ndryshime të prekshme me vullnetin e tyre”, deklaroi ajo.
