Kryeministri Rama ka përcjellë urimin për këtë vit që po lëmë pas, ku thotë se ishte një sfidë e madhe për të gjithë shqiptarët. Duke e nisur mesazhin e tij me një video nga jeta e tij e përditshme, ku agjenda është e ngjeshur, ai ndalet për pak çaste për të rikthyer në kujtesë se çfarë kemi kaluar. Nga pasojat e pas tërmetit dhe përballjen me armikun e padukshëm, koronavirusin. Kreu i qeverisë shprehet në mesazhin e fundvitit se përpjekja vijon për sigurimin e vaksinës, e cila do të jetë falas dhe jo e detyrueshme.
“Po mbyllet edhe ky vit, dhe si në asnjë vit tjetër, festat e këtij fundviti po i kalojmë në shtëpi. As mesnata e fishekzjarreve nuk do të ndodhë këtë herë. Ky është viti më i vështirë. Për ne shqiptarët, koronavirusi ishte një kafshatë e pakapërdishme pas tërmetit të 26 nëntorit.
Gjyshërit u kërcënuan në jetën e tyre, fëmijët e ndaluar në shkollimin e tyre. Mijëra prindër humbën punët e tyre. Ne luftuam dhe po luftojmë për të dalë nga kjo përballje. Sot shkollat e shembura po rilindin me kushte shumë të mira.
Po rilindin sa më të forta. Nuk ka kënaqësi më të madhe për mua se sa hapja e dyerve të shtëpive të reja. Puna vazhdon çdo ditë falë 25 mijë punëtorëve të palodhur. Vazhdon çdo ditë përpjekja jonë kundër armikut të padukshëm, si dhe për sigurimin e vaksinës që do të fillojë në fillim të vitit të ardhshëm. Vaksina do jetë falas dhe jo e detyrueshme. Kjo luftë nuk pritet të mbarojë deri në fund të vitit të ardhshëm. Do mbështesim të banorëve që kurohen në shtëpi. Do vijojmë të ndihmojmë familjet në nevojë. Nga janari bluzat e bardha do të marrin një pagë 40% më shumë. Jemi krenar për ta. Ky vit e ka goditur fort ekonominë dhe punën”, tha Rama.
“GËZUAR 2021
Më e keqja është mbrapa krahëve, më të mirën e kemi të gjithën përpara
#Besim #Kurajo #Durim”, shkruan Rama krahas videos në fjalë.
