Rama është prononcuar për mediat pas takimit informal me liderët e BE-së. Ai deklaroi se diskutimi ishte fokusuar mbi sfidat e përbashkëta të Shqipërisë dhe BE-së, metodologjinë e re të zgjerimit dhe thellimin e bashkëpunimit rajonal. Kryeministri Rama tha se vlerësimi i Komisionit Europian për Shqipërinë do të jetë pozitiv, pasi vendi “i ka bërë të gjitha detyrat”.
Cila do jetë e ardhmja e negociatave pas darkës së sotme?
Jam i fokusuar tek ajo që do jetë kurorëzimi i një rruge të gjatë, që është konferenca e donatorëve nesër. Por kemi diskutuar dhe për temën që ju thoni. Ka ardhur momenti që të themi të vërteta, dhe të mos ngelet topi në fushë. Ka një dakordësi për metodologjinë e re dhe një rilindje të procesit të zgjerimit të vendeve kandidate, jo vetëm për bazën e sotme por dhe për aspektet financiare. Do shikojmë më tutje, kemi rënë dakord që të vijojmë diskutimet për të dalë në disa konkluzione solide deri në samitin e Zagrebit.
Prisni një vlerësim pozitiv nga Komisioni Evropian?
Ka qenë pozitiv, dhe do jetë pozitiv, pasi nuk ka si të jetë ndryshe, pasi ne i kemi bërë detyrat. Por ne çfarë i bëjmë, i bëjmë për veten tonë dhe jo për ndërmarrjen e Bashkimit Evropian, pasi atyre u takon të thonë fjalën e tyre për punën tonë.
E ardhmja e Shengenit Ballkanik?
Kemi diskutuar për të ardhmen e një bashkëpunimi rajonal, më herët se vonë Bashkimi Evropian do ta mbështesë këtë nismë dhe do duhet dhe pak durim, pasi ngatërrestarët janë dhe në Evropë. Do presim derisa BE të ketë fokusin tek kjo nismë dhe kam bindjen se BE do ta mbështesë fuqimisht dhe do vlerësojë shtetet që kanë marrë pjesë në këtë shengen rajonal.
