Në fjalën e marrë në Kuvend, kryeministri Edi Rama foli sot për procesin e rindërtimit dhe koston që do të zërë ky proces në buxhetin e vitit 2021.
Rama tha se qeveria po ndërton shtëpi falas, të cilat do t’ju jepen qytetarëve me standarte evropiane. Ai e ka nisur fjalën e tij sot në Kuvend, duke sulmuar opozitën.
Kreu i qeverisë nuk ka lënë pa thumbuar presidentin ilir Meta, dhe kreun e opozitës Lulzim Basha. Rama kujton krizat e viteve 1997 dhe 2013, ku thotë se mazhoranca e dikurshme ose opozita që do të rikthehet në pushtet, shkaktoi dy gropa borxhesh.
“Në vitin 2020, problem janë njerëzit e 1997. Pak më pas, në 2013, pasi Shqipëria bëri zgjedhjen e duhur për të larguar nga detyra të njëjtët njerëz, me një tjetër gropë borxhesh dhe likujditetesh.
Iliri është në barkun e Lulit si luan, jo si lepur. Sot janë të njëjtët njerëz. Ka eksperienca të mira dhe të këqija.
Po ndërtojmë lagje me cilësi evropiane. Kërkoni në eksperiencat e tjera, dhe thoni ku është bërë falas kjo.
Jepen me kredi të buta, afatgjata, por jo falas. Ne do t’i japim falas, kush i jep falas më thoni?
Njerëzit kanë nisur të hyjë në shtëpitë e reja. Janë afro 30 mijë familje të prekura nga fatkeqësia, që nga ato që humbën shtëpinë dhe ishin pa çati tek ato që nuk banojnë dot tani që flasin në apartamente, se apartamentet janë të dëmtuara.
Për të gjitha ato familje, ky vend ka patur Zot, se asnjë nuk u la si familjet që u përmbytën në Shkodër. 1 përmbytje qe, 5 apo 6 milionë dollarë qenë për ato familje dhe u desh të vinim ne në pushtet që ato të merrnin lekët për të mos vazhduar njësoj”.
