Kryeministri Edi Rama i është përgjigjur kritikave të deputetit Ralf Gjoni, teksa akuzoi komisionerin Oliver Varhelyi, se po gënjen në disa pika. Në kundërpërgjigje, Rama tha se Komisioneri ka qenë një mbështetës i pakursyer i të gjithë vendeve të Ballkanit, dhe i Shqipërisë në procesin e përshpejtimit të rrugës për të negociuar anëtarësimin në BE. Kreu i qeverisë e ka përmbyllur fjalën duke nënvizuar se Oliver Varhelyi ka treguar ndershmërinë, duke i thënë gjërat ashtu siç janë.
“Që në sekondën e parë të fillimit të punës, Komisioneri ka qenë një mbështetës i pakursyer i të gjithë vendeve të Ballkanit dhe i Shqipërisë, në procesin e përshpejtimit të rrugës së çeljes së dyerve për të negociuar anëtarësimin në BE.
Siç do ta thotë vetë sot, nuk është mjaftuar vetëm me këtë aspekt të Komisionit, por është angazhuar për një plan masiv ekonomik. Ai ka treguar ndershmërinë e tij të thënit të gjerave ashtu siç janë, qoftë kur do na i thotë neve, qoftë kur i thotë për ne në Bruksel”, tha Rama.
