Nga Anxhela Ferra
Dita e hënë shënon edhe ditën e fundit si kryeministër i Kosovës për Ramush Haradinajn. Ditën e premte ai bëri me dije se do të dorëzonte postin, pasi është thirrur sërish nga Gjykata Speciale e formuar këtë vit po në Hagë. Menjëherë pas lajmit politikanë, diplomatë dhe mijëra qytetarë kanë reaguar për lajmin. Pjesa më e madhe e të cilëve ishin në mbështetje për Haradinajn. Kjo do të jetë përballja e tretë e Haradinajt me drejtësinë në Hagë, pasi dy herë më parë i ka fituar. Por, me thirrjen prej tyre, ai vendosi të përballet me ligjin si një qytetarë i lirë.
Por, veç mbështetjes për ish-komandantin e luftës së Kosovës, njerëzit në Shqipëri kanë nisur me paralelizma. Duke vendosur përballë kryeministrin Rama, lidhur dhe me gjendjen e rëndë politike të krijuar në Shqipëri.
Qytetarët thonë për Tirana Today se për ta Ramush Haradinajn është burrë burrë-shteti. Ndërkohë politikanët tanë as nuk i afrohen. Për ta Rama është tradhtar dhe është gati të shesë vendin për dy lekë.
“Haradinaj ka bërë shumë mirë që ka dhënë dorëheqjen e të shkojë të bëjë procesin në Gjykatë. Politika jonë duhet të bëjë të njëjtën gjë. Por, ai që duhet të japë menjëherë dorëheqjen sigurisht që është Edi Rama.”
“Politika jonë duhet të marr shembull nga Haradinaj, sepse ai po që ka qenë burrë shteti. Madje ne si shqiptarë që jemi, frymëzohemi nga ai. Këta tanët burra shteti janë, por sikur e dredhin nga pak, sidomos kur përkulen para serbëve.”
“Ata që dalin dhe trumbetojnë me të madhe emrin e Haradinajt, që nga presidenti etj., nuk duhet të ndihen fare. Nuk duhet të flasin fare për Haradinajn sepse nuk krahasohen më të.”
“Dorëheqja e Haradinajt është një akt qytetaria, ndaj dhe politika jonë të mësojë e japë dorëheqjen. Haradinaj është nacionalistë, kurse këta të tjerët janë tradhtarë. Nga Thaçi, te ky i yni po tradhtojnë kombin. Në Shqipëri ende nuk ka burra shteti, ndoshta në të ardhmen del ndonjë. Por, deri më tani pas kurrizit na e kanë ndarë gjithë vendin.”
Ndër të tjera, qytetarët shprehen se politika shqiptare duhet të reflektojë. Veçanërisht, kur ka shembuj të njerëzve që duan vendin e vete, shumë pranë vetes.
“Nuk mund të flas për politikanët shqiptarë sepse ata janë ndryshe. Sidomos nëse i krahasojmë me Harandinën. Nuk e japin kollaj dorëheqjen, edhe pse mund ta kërkojë populli apo ndonjë parti tjetër. Jemi afër dhe jemi shqiptarë, por në pikëpamjet politike jemi shumë ndryshe.”
“Politika shqiptare duhet të marr gjënë më të duhur nga veprimi i Haradinajt për vendin e tij. Këta të tanët nuk kanë ndërmend ta japin dorëheqjen. Aty nëpër ato karrige do të plaken, nuk do bëjnë ndonjëherë ndonjë gjë të mirë për popullin. Duhet të niset ikja që nga Rama.”
“Veprimi i Haradinajt është një gjë shumë e mirë. Politika jonë duhet të shohë më shumë përreth e të marr mësim nga të tjerët. Në Shqipëri nuk ka burra shteti, derisa të ngrihet një popull në këmbë duhet t’i japësh drejtim. Prandaj mirë bën që të japë Rama dorëheqjen.”/ TIRANA TODAY
