Cigaret elektronike, janë hedhur për herë të parë në treg në vitin 2003. Pas 16 vitesh, përdorimi i tyre global është rritur shumë. Në vitin 2018, numëroheshin të paktën 41 milionë përdorues. Cigaret elektronike, janë promovuar si një mënyrë që i ndihmon duhanpirësit e zakonshëm, të lënë duhanin. Përbërësi kryesor është sërish nikotina.
Por me kalimin e kohës, dolën mbi 1500 variante të ndryshme. Shumica përdorin aromat tradicionale të pëlqyeshme nga të gjithë si mentja, vanilja etj. Për pasojë, nga duhanpirësit, cigare të tilla nisën të përdoren edhe nga të rinjtë, që nuk kishin pirë ndonjëherë cigare normale. Shkenca e përkrahu në fillim këtë metodë.
Kohët e fundit, është zbuluar se efektet anësore, janë më të mëdha sesa përfitimet. Kështu, testet e 166 produkteve të cigareve elektronike, kanë treguar se 1 në 5 prej tyre, përmbajnë kimikate aromatizuese, që mund të jenë toksike për rrugët e frymëmarrjes. Në SHBA, ka pasur muajt e fundit qindra vdekje të papritura të disa të rinjve, që dyshohet se kanë ardhur nga përdorimi i cigareve elektronike. Shumë shtete në SHBA, e kanë ndaluar tashmë me ligj përdorimin e tyre.
Ndërkohë, po kështu kanë vepruar mbi 20 vende në botë. Edhe në Shqipëri, cigaret elektronike, janë shumë në modë, sidomos tek te rinjtë. Qeveria miratoi së fundmi një ligj që ndalon përdorimin e tyre në ambientet e mbyllura. Por pavarësisht lajmeve shqetësuese nga SHBA, autoritetet nuk kanë ende një qëndrim mbi efektet negative të cigareve elektronike./ TIRANA TODAY
