Qeveria ka vendosur me një vendim të posaçëm që të heqë të gjitha shpërblimet për punonjësit e administratës në fundvit. Ky vendim, i cili është marrë në datën 6 dhjetor, parashikon që të ndalohet përdorimi i fondit të posaçëm, rezervë të institucioneve ku parashikohet edhe organizimi i aktiviteteve kulturore apo i shpërblimeve. “Pika 9, e vendimit nr. 929, datë 17.11.2010, të Këshillit të Ministrave, të ndryshuar, riformulohet, si më poshtë vijon: Përjashtimisht për vitin 2019, fondi i veçantë i institucioneve qendrore, buxhetore dhe jo buxhetore, institucioneve të vetëqeverisjes vendore, njësive të fondeve speciale, institucioneve publike, të krijuara me ligj të posaçëm, ndërmarrjeve dhe shoqërive tregtare me kapital mbi 50% shtetëror, në varësi të institucioneve qendrore dhe të vetëqeverisjes vendore, nuk do të përdoret për veprimtari social-kulturore dhe shpërblimin e punonjësve”, thuhet në VKM me numër 781. Sakaq është bërë me dije se janë urdhëruar që të njëjtin urdhër ta zbatojnë edhe bashkitë që pjesa më e madhe e tyre qeverisen nga socialistët. Vendimi është botuar në Fletoren Zyrtare dhe hyn në fuqi menjëherë. Pak ditë më parë, kryeministri Rama paralajmëroi se këtë vit nuk do të ketë shpërblime për atë pjesë të administratës, që kanë përfituar gjatë viteve të fundit. Kjo ka të bëjë me gjendjen e jashtëzakonshme që po kalon Shqipëria pas tërmetit të 26 nëntorit, ku pati 51 viktima në zonën e Durrësit dhe të Thumanës, si edhe mijëra banorë që kanë mbetur në qiell të hapur e mijëra banesa të dëmtuara.
Bllokohen lejet e ndërtimit
Agjencia e Zhvillimit të Territorit ka shpërndarë një njoftim për aplikantët për leje ndërtimi, ku ka deklaruar se dhënia e lejeve të reja të ndërtimit është e bllokuar pas tërmetit të 26 nëntorit. “Bazuar në kërkesën e disa bashkive të prekura nga dëmet e tërmetit të datës 26.11.2019, si dhe në kuadër të shpalljes së gjendjes së fatkeqësisë natyrore për qarqet Tiranë, Durrës dhe Lezhë si pasojë e tërmetit të datës 26.11.2019, miratuar me vendim të Këshillit të Ministrave nr.750, datë 27.11.2019, ndryshuar me VKM Nr.751 datë 29.11.2019, ju njoftojmë se është realizuar pezullimi i aplikimit për leje ndërtimi në qarqet Tiranë, Durrës, Lezhë”, thuhet në njoftimin e shpërndarë nga AZHT. Sakaq Agjencia e Zhvillimit të Territorit, është duke punuar edhe për pezullimin e afateve të lejeve që ishin në proces miratimi që prej datës 26 nëntor. AZHT-ja ka deklaruar ndër të tjera se për këto qarqe mund të aplikohet shërbimi vetëm “Aplikim për leje ndërtimi, riparimi, restaurimi”. Njoftimi u është shpërndarë bashkive që janë në këto qarqe, Durrës, Tiranë, Vorë, Shijak, Krujë, Kavajë, Rrogozhinë, Kamëz dhe Kurbin. INSTAT raportoi se në tremujorin e tretë 2019 janë miratuar gjithsej 293 leje ndërtimi për ndërtesa të reja, nga 343 leje të miratuara në tremujorin e tretë 2018, duke shënuar një rënie prej 14,6 %. Por, nga ana tjetër, sipërfaqja e lejeve të ndërtimit miratuar për ndërtesa të reja, në tremujorin e tretë 2019, ishte 685.455 m², nga 330.725 m² miratuar në tremujorin e tretë 2018, duke shënuar një rritje me 2.1 herë.
Riparohen pallatet e ndërtuara para ‘93
Të gjitha pallatet e ndërtuara përpara vitit 1993 do t’i nënshtrohen rikonstruksionit. Këshilli Bashkiak ka vendosur në mbledhjen e djeshme që të krijohet armata me 100 punëtorë ndërtimi, që do të riparojnë pallatet e ndërtuara para këtij viti. Kjo forcë do të jetë në varësi të Drejtorisë së Rrugëve pranë Bashkisë së Durrësit. Gjithashtu, ditën e djeshme u miratuan edhe disa ndryshime në bonusin e qirasë që do të përfitojnë familjet e dëmtuara nga tërmeti. /Gazeta SOT
