Ndalimi i qarkullimit të automjeteve, ka sjellë edhe boshatisjen për kryeqytetin e jo vetëm. Në rrugë lejohen vetëm mjetet që kanë autorizim. Policia kërkon nga ana e qytetarëve që të qëndrojnë në shtëpi, duke bërë të mundur kufizimin e përhapjes së koronavirusit.
“Ajo që kërkohet nga çdo qytetar është të rrijë në shtëpi, duke respektuar oraret e vendosura, në kuadër të masave për parandalimin e përhapjes së COVID-19. Na ndihmoni dhe ju, të mos ndëshkoheni me gjoba!”, njofton policia.
Mëngjesin e sotëm është shënuar viktima e dytë nga koronavirusi në Shqipëri. Bëhet fjalë për një 66-vjeçar nga Lushnja, i cili prej disa ditësh ishte në gjendje të rëndë në Spitalin Infektiv të Tiranës. Ai mbahej në jetë me anë të aparaturave.
I moshuari ishte i shtruar fillimisht në spitalin “Shefqet Ndroqi” nga mushkëria, ku dhe u infektua nga një i afërmi i tij që i erdhi për vizitë, i cili i fshehu se kishte qenë në Itali disa ditë më parë.
Ministria e Shëndetësisë sqaroi se i moshuari vuante nga disa sëmundje shoqëruese si veshkat, zemra dhe probleme në mushkëri.
Një ditë më parë u njoftua se njëri prej të infektuarve të parë po shkon drejt shërimit të plotë. Analiza e tij ka dalë negative, dhe brenda 48 orëve do të ketë një të dytë.
Në vendin tonë janë shënuar 55 të infektuar nga koronavirusi, nga të cilët 2 kanë ndërruar jetë. Mes të infektuarve, 9 janë mjekë të spitalit “Shefqet Ndroqi” në Tiranë dhe spitalit të Durrësit.
