Ish-kongresmeni amerikan Joe Dioguardi i cili ka kushtuar një vëmendje të jashtëzakonshme çështjes shqiptare përgjatë gjithë karrierës së tij politike por edhe në ditët e sotme, së fundmi i është përkushtuar asaj që po ndodh me tezën e ngritur për shkëmbime territoresh mes Kosovës dhe Serbisë.
Në një intervistë të realizuar nga gazetari Saimir Sulaj për agjencinë INA, në Uashington, Dioguardi flet për autorët e kësaj teze, siç është presidenti i Kosovës, i cili ka propozuar korrigjimin e kufijve duke lënë të kuptohet për një shkëmbim territoresh mes Serbisë dhe Kosovës.
Arsyet që e kanë shtyrë Thaçin të hedhë në opinionin publik një tezë të tillë sipas sish-kongresmenit amerikan lidhen me ngritjen e Gjykatës Speciale për krimet e luftës, e cila mund ta marrë të pandehur presidentin e Kosovës.
Sipas DioGuardit, në këtë pikë Thaçi është i gatshëm të bëjë lëshime ndaj serbëve, të cilët mesa duket sipas ish-kongresmeni, Hashim Thaçi nuk i njeh aspak.
“Pra, së pari duhet thënë që, dhe këtë do ta dëgjosh nga Shirley dhe gjithkush tjetër, ne nuk duhet të flasim derisa Serbia të thotë se ne e njohim pavarësinë e Kosovës. Pasi kjo të ndodhë, tregohet se kemi mirëbesim mes palëve. Serbia ka një arsye përse duhet ta bëjë këtë, pasi dëshiron të bëhet pjesë e Bashkimit Evropian. Dhe BE ia ka thënë Serbisë: Duhet të tregohesh fqinj i mirë. Nëse nuk je fqinj i mirë, mos e mendo se do të bëhesh pjesë e Bashkimit Evropian. Serbët janë fqinj të tmerrshëm për shqiptarët. Ata gënjejnë, ata trazojnë ujërat, ata manipulojnë dhe kanë politikanë në Shqipëri dhe veçanërisht në Kosovë, dhe mund të përmend emrat e tyre, si Thaçi dhe Haradinaj, që kanë strategjinë e tyre vetjake, bazuar në atë që beson partia e tyre, në atë që ata besojnë. Nuk është ajo që njerëzit duan. Pra, deri tani ne nuk e dimë. Thaçi mbi të gjithë, është i shqetësuar se shkon si i pandehur në Gjykatën e Hagës apo në Gjykatën Speciale dhe kështu që ai është i gatshëm për të bërë lëshime”, shprehet Dioguardi.
