Askush, madje as më të rinjtë, nuk janë imunë ndaj COVID-19. Por gjithnjë e më shumë prova shkencore, tregojnë se gratë duket se përballen më mirë me këtë sëmundje agresive. Sipas shumë të dhënave, ato jo vetëm që infektohen më pak nga burrat, por edhe kur ndodh, infektimi me koronavirus shkakton më pak simptoma të rënda apo edhe vdekje.
Sipas buletinit të 23 marsit të Institutit të Lartë të Shëndetësisë në Itali, 58 për qind e pacientëve pozitivë ndaj koronavirusit të ri janë meshkuj: ose 33.399 nga 57.444 të infektuar që janë marrë nën shqyrtim. I njëjti dokument shprehet se “diferenca në numrin e rasteve të raportuara sipas gjinisë, rritet në mënyrë progresive në favor të meshkujve deri në grupmoshën 70-79 vjeç”.
Ndërkohë në grupmoshën mbi 90 vjeç, numri i rasteve të gjinisë femërore e tejkalon atë të rasteve mashkullore, ndoshta për shkak të strukturës demografike të popullatës, pasi gratë jetojnë më gjatë se burrat.
Më pak vdekje
Gjithashtu, gratë duket se kanë prirje të kenë një rezistencë më të madhe ndaj sëmundjes. Në raportin e datës 20 marsit të Institutit të Lartë Shëndetësor në Itali, që flet mbi karakteristikat e 3.200 pacientëve që kishin vdekur deri në atë moment, dhe që ishin pozitivë me COVID-19 në Itali, thuhet se 29.4 për qind e viktimave nga COVID-19 ishin femra, dhe se “gratë që vdiqën pas kontraktimit të infeksionit COVID-19 janë më të moshuara se sa burrat (moshat mesatare e grave 82-vjeçe, ndërsa e burrave 79-vjeç).
Dhe siç e dimë, mosha është gjithashtu një faktor rreziku për simptoma më serioze të sëmundjes. Sipas një analize të të dhënave të kryer nga Qendra Kineze për Kontrollin dhe Parandalimin e Sëmundjeve, në 44.672 raste pozitive me COVID-19, 2.8 për qind e burrave ndërruan jetë, ndërsa sëmundja ishte fatale vetëm për 1.7 për qind të grave. Por nga çfarë varet ky efekt i mundshëm mbrojtës?
Një reagim më i fuqishëm
Një shpjegim i parë i mundshëm, mund të gjendet tek karakteristikat e sistemit imunitar të grave. Edhe pse arsyet nuk janë plotësisht të qarta, disa përgjigje të sistemit imunitar janë më vendimtare tek gratë. Ato përballen më mirë me disa infeksione të frymëmarrjes.
Dhe kjo është vërejtur edhe gjatë disa epidemive të mëparshme, siç ishte ai i SARS-it, në vitet 2002-2003 dhe Gripi Spanjoll. Arsyeja mund të ketë të bëjë me evolucionin:gratë duhet të transmetojnë antitrupat tek fëmijët përmes placentës. Gjithsesi, sistemit imunitar i femrës ka gjithashtu edhe aspektet e veta negative:gati 80 për qind e njerëzve që vuajnë nga sëmundjet autoimune janë pikërisht gra.
Hormonet dhe gjenetika
Një arsye për këtë “mburojë” ndaj viruseve mund të jetë e natyrës hormonale: estrogjenet e prodhuara me bollëk nga trupi i femrës deri në menopauzë, duket se luajnë një rol të rëndësishëm në reagimin imunitar.
Një arsye tjetër më e qëndrueshme, ka të bëjë ndodhta me kromozomin e dyfishtë X. Disa gjene që lidhen me përgjigjen e sistemit tonë imunitar, gjenden pikërisht në këtë kromozom, dhe të paturit 2 kopje të tij, mund të ketë një efekt më të madh mbrojtës.
Stili i jetesës
Faktorë të tjerë, mund të lidhen me stilin e jetës dhe prirjen për t’u kujdesur për shëndetin vetjak. Zakoni i pirjes së duhanit, krijon kushtet ideale për përhapjen e sëmundjeve të frymëmarrjes, dhe gjesti i futjes së cigares në gojë (ndoshta me duar të pista) mundet – edhe pse kjo vetëm një hipotezë – të ketë luajtur një rol në dominancën mashkullore të kësaj sëmundjeje, sidomos në Kinë.
Në këtë vend, 52.1 për qind e burrave pinë duhan, ndërsa tek gratë përqindja është vetëm 2.7. Së fundmi, burrat vuajnë më shpesh nga hipertensioni, pra nga presioni i lartë i gjakut:një faktor rreziku për shumë probleme kardiovaskulare, të cilat nga ana tjetër mund të përkeqësojnë simptomat e COVID-19.
TIRANA TODAY
