Marrëveshja e 5 qershorit, e dakordësuar mes PS dhe PD me ndërmjetësimin e ndërkombëtarëve, do të miratohet në seancën e ditës së sotme. Në fjalën e marrë në Kuvend, kryeministri Edi Rama u shpreh se PS-ja në raport me PD-në ka lëshuar më shumë, madje deri në vetëlëndim.
Duke folur për marrëveshjen e Reformës Zgjedhore, Rama tha se PS nuk ka lidhje me diktaturën. Nga foltorja e Kuvendit, ai u ka bërë thirrje deputetëve të pranishëm që të votojnë marrëveshjen e 5 qershorit të arritur nga të gjitha palët politike për Reformën Zgjedhore.
“Të gjithë demokratëve që besojnë te Basha dhe PD-ja, apo të tjerëve në ato rreshta, por që i janë bashkuar PD-së, u them sot se kjo është Partia Socialiste, këta jemi ne që nuk kemi asnjë lidhje me akuzat, përrallat dhe legjendat për diktatura.
Në çdo stacion nuk ka qenë PD-ja, por PS-ja qoftë në opozitë apo pushtet, që ka qenë ana tolerante, lëshuese deri në vetëlëndim, se vetëm një forcë si e jona mund të vetëlëndohej sikur u vetëlëndua nga heqja e raundit të dytë.
Po ta shikosh me logjikë të ftohtë, është vetëvrasje politike, që një forcë shumice të heqë dorë nga raundi i dytë në një moment të caktuar.
Mund ta kujtojë Murrizi kur PS-ja u tërhoq nga raundi i dytë, balotazhi, një çmenduri, por nëse e shikojmë ku po përpiqem të them këtë mesazh, e kundërta do të ishte e çuditshme, që PS-ja të thoshte; JO”, tha ai.
