Deputetja socialiste Mimi Kodheli, veç faktit që ia ka deleguar fajet opozitës për ngërçin në vend, nuk ka lënë pa përgjegjësi edhe qeverinë. Ky ka qenë mendimi i saj, shprehur në studion e “Ora News”. Ajo tha gjatë intervistës se qeveria nuk është aktori dhe faktori i vetëm i jetës politike, e që gjërat të funksionojnë duhet edhe kontributi i opozitës.
“Qeveria duhet të ndjejë përgjegjësi për të gjitha situatat e krijuara në vend. Problemi është që qeveria nuk është aktori dhe faktori i vetëm i jetës politike, ndaj në një demokraci funksionale duhet që të dyja anët e ekuilibrit politik të funksionojnë, në mënyrë që gjërat të shkojnë më mirë se ç’duhet.
Patjetër që qeveria ndjen dhe ka përgjegjësitë e veta. Mua më vjen shumë keq që retorika politike e ka sjellë vendin në këtë derexhe. Në të gjitha momentet e rëndësishme, kush ka ditur të tregohet burrë apo grua shteti, apo forcë politike serioze e ka demonstruar këtë përtej gjithë retorikës politike dhe vështirësive që ka pasur në atë moment politika. Të krijohet ideja sikur ka një acarim social që nuk është e votuesve, por e politikës në momente kyçe siç është hapja e negociatave”, përfundoi ajo.
