Sot gjatë ditës është njoftuar mbajtja e një proteste- marshim, si reagim ndaj marrjes së jetës së Klodian Rashës nga një efektiv i forcave Shqiponja. Protesta është parashikuar të nisë në orën 18:00.
Grumbullimi do të nisë në sheshin “Skënderbej”, për të vijuar më pas në formë marshimi në bulevardin “Dëshmorët e Kombit” dhe Drejtorinë e Policisë.
Rreth 900 forca policore do të jenë në terren, ndërkohë që nga autoritetet; marshimi është konsideruar i paligjshëm për shkak të ndalimit të grumbullimeve në situatën Covid.
Sikundër gjatë 4 ditëve që janë zhvilluar protesta për 25-vjeçarin e ndjerë, edhe sot ka një numër të madh të efektivëve të policisë, të pozicionuar në institucionet kryesore. Autobotët për shpërndarjen e turmave janë vendosur pranë Ministrisë së Brendshme, Kryeministrisë, por dhe pranë Drejtorisë së Policisë.
