Pas protestës së zhvilluar dje në Shkodër, ku u shënuan një sërë incidentesh, kryetarja e Bashkisë së Shkodrës, Voltana Ademi është proceduar penalisht. Policia njofton se Voltana Ademi është proceduar për veprën penale “Organizimi dhe pjesëmarrja në grumbullime e manifestime të paligjshme”.
Ademi reagoi pas sulmit në selinë e PS, ku tha se ishin një grup i veçuar protestuesish që u nisën drejt selisë rozë. Ajo shtoi se kishte njoftuar menjëherë policinë, por se ata nuk reaguan në kohë.
Kryetarja e Bashkisë së Shkodrës ka denoncuar në Prokurori, drejtuesit e Policisë së Shtetit. Mësohet se ajo ka bërë denoncimin duke kërkuar “Procedimin penal të punonjësve dhe të drejtuesve të Policisë së Shtetit, për kryerjen e veprës penale “Shpërdorimi i detyrës”.
“Qytetarët duhet ta dinë se kur disa të rinj, të panjohur dhe të pambështetur nga protestuesit e tjerë, u drejtuan nga selia e PS, njoftova autoritetet më të larta të Policisë në Shkodër. Policia ndenji me duar në xhepa, duke parë dhunimin e selisë, pa bërë asnjë veprim.
Ata nuk ju përgjigjën thirrjes për ruajtjen e rendit dhe sigurisë publike”, thuhet në kallëzimin e Kryetares së Bashkisë Shkodër ndaj drejtuesve të Policisë Shkodër.
Kallëzimi penal është bërë për mos zbatim të detyrave që sanksionon ligji për Policinë e Shtetit në nenet 17, 105, etj., përkatësisht për mos angazhimin në mbrojtjen e pronës publike dhe private; mos ruajtjen e rendit dhe sigurisë publike; mos parandalimin në përputhje me legjislacionin penal dhe procedural penal; për mos marrje dhe trajtim pranë strukturave përgjegjëse, ankesat e shtetasve, në mënyrë të veçantë kallëzimet penale ose informacionet e dhëna në rrugë të ndryshme për vepra të ndryshme penale.
