Në kohën që policia e kishte shpallur në kërkim, Stresi ishte arratisur drejt Kosovës. Në një rrëfim për ‘Prive’, ai ka zbuluar se ka marrë një shok që punon me funeralet dhe kanë shkuar në Laç, e më tej në Kosovë. “Mora një shok të timin që punon me makinat e varrimeve, vetëm për të dalë nga protesta. Kemi shkuar deri në Laç me të. Aty pastaj drejt Kosovës”, ka treguar reperi, duke falenderuar gjithë miqtë që e ndihmuan të shkonte drejt Kosovës.
Më tej, ai është shprehur se në protestë nuk ishin personalisht për ministrin Lleshaj që dha dorëheqjen, por për institucionet dhe kabinetin e Rilindjes. Por ai nuk e ka lënë me kaq, ndërsa ka kërkuar mbështetje nga ana e qytetarëve.
Këngëtari Arkimed Lushaj i ka bërë thirrje qytetarëve që të mblidhen sërish, dhe të protestojnë për vrasjen e Klodian Rashës. Duke qenë se akuzohet për organizim proteste në kushte pandemie dhe nxitje dhune, Stresi u arratis me makinë funerali drejt Kosovës dhe aktualisht është i shpallur në kërkim. Ndonëse i shpallur në kërkim, ai i ka bërë thirrje qytetarëve që të bashkohen në protestën që do të zhvillohet sot, në ditën e pestë të saj.
“Unë jam Klodiani se mos më harruat. Kaq e nisëm ditën e parë të protestës, po pa ju o popull, se nis dot më, kam nevojë për ju,” shkruan Stresi në postimin e tij, ku shfaqet me disa miq të maskuar për të mos u identifikuar fytyrat.