Ditën e sotme Gjykata e Krimeve të Rënda pritet të japë vendimin për ish-ministrin e Brendshëm Saimir Tahirin. Kujtojmë se në seancën e datës 10 shtator, Prokuroria për Krime të Rënda kërkoi shpalljen fajtor dhe dënimin me 12 vite burg për ish-ministrin e Brendshëm.
Ky i fundit e quajti procesin të montuar politikisht dhe kërkoi nga Gjykata shpalljen e tij të pafajshëm. Gjykata e shtyu seancën për në datën 19 shtator, ditën e sotme, dhe pritet të lexohet mbrojtja e Jaeld Çelës dhe më pas treshja gjykuese do të tërhiqet për të dhënë vendim.
Seanca e kaluar zgjati më shumë se 8 orë. Tre prokurorët e çështjes, Arens Çela, Dritan Prençi dhe Vladimir Mara, lexuan pretencën duke renditur provat dhe faktet që sipas tyre, vërtetojnë fajësinë e ish-ministrit në trafikimin e lëndëve narkotike në kuadër të grupit kriminal.
