Projektligji/ Gazetari: Rama shpif për mua në kuvend, unë nuk mund të ankohem

Gazetari Gjergj Erebara ka dhënë komentin e tij në lidhje me çështjen e paketës antishpifje, që u publikua nga qeveria e kryeministri Rama.

I ftuar në emisionin “Të Paekspozuarit” në News 24, Erebara deklaroi se ky projektligj krijon pabarazi sepse askush nuk mund të ankohet nëse kryeministri shpif në parlament.

“Nëse unë shpif ndaj kryeministrit dhe këtë shpifjen time e publikon portali i Entonit, kryeministri ankohet për portalin e Entonit dhe i vendos atë pop-up (një pullë e ngjashme me reklamat, që vendoset në ballinën e portalit). Në rast se kryeministri shpif ndaj meje në Kuvendin e Shqipërisë dhe e publikon portali i Entonit, unë nuk kam të drejtë të ankohem sepse ligji thotë se raportimet në sesionet e hapura të Kuvendit, janë të vërteta. Pra, çdo gjë që thotë shteti është e vërtetë dhe e pakontestueshme, pavarësisht se çfarë dëmi mund të të shkaktojë ty si qytetar. Për këtë arsye po them, që “derrat” nuk janë të barabartë me këtë ligj”, u shpreh gazetari.