Procedimet penale dhe shoqërimet në polici duket se nuk kanë ndërmend të ndalin fierakët. Këta të fundit janë mbledhur sërish dhe kanë dalë në protestë pikërisht drejt vendit ku është planifikuar që kryeministri Rama të mbajë një takim.
Me pankarta në duar, protestuesit kërkojnë largimin e kryeministrit Rama, ndërsa synojnë që të pengojnë edhe zhvillimin e takimit të planifikuar.
Policia ka krijuar një kordon për pengimin e protestuesve, ndërsa pritet mbërritja e kryeministrit nga çasti në çast. Mes protestuesve është edhe ish-deputeti demokrat Luan Baçi, i cili akuzon se po provokohen me praninë e policisë në mënyrë të qëllimshme.
Eventi i organizuar nga qeveria ishte planifikuar të niste në orën 11:00, ndërsa nuk dihet nëse do të mund të zhvillohet për shkak të protestës.
Edhe dje, fierakët pritën kryeministrin Rama me protestë, ndërsa policia ka arrestuar në flagrancë 4 persona dhe procedoi penalisht 41 shtetas të tjerë.
