Ambasadorët e huaj në Tiranë, janë vënë në lëvizje për të detyruar palët të mbyllin Reformën Zgjedhore, sikundër kanë premtuar më herët. Ambasadorët e SHBA-BE dhe të Britanisë së Madhe, do të ngjisin shkallët e selisë blu këtë të hënë, në orën 15.00.
Yuri Kim, Luigi Soreca, Duncan Norman do të shkojnë në zyrën e kryedemokratit në orën 15:00, fill pas përfundimit të takimit me aleatët e partive opozitare.
Palët u dakordësuan dhe u zotuan që ta përfundonin Reformën brenda 31 majit, por tashmë pas këtij premtimi të pambajtur, ndërkombëtarët janë vënë në lëvizje.
Paraditen e së hënës, diplomatja amerikane lëshoi një mesazh të prerë për Partinë Demokratike, ku kërkoi që të mbahet fjala e dhënë para shqiptarëve, dhe të mos dilet me kërkesa të reja.
Pas reagimit të ambasadores së SHBA, Yuri Kim, ka reaguar edhe ambasadori i BE në Tiranë, Luigi Soreca.
Në një postim në Twitter, Soreca thotë se ekzekutimi i Reformës Zgjedhore, është kusht i domosdoshëm për integrimin e vendit në BE, ndërsa shprehet se palët politike duhet të arrijnë menjëherë në një marrëveshje.
“Ekzistimi i reformës plotësisht në përputhje me rekomandimet e OSBE / ODHIR është kusht i domosdoshëm për të integrimin në BE. Një marrëveshje e menjëhershme nga të gjitha palët në Këshillin Politik, është e mundshme dhe duhet të përfundohet tani për të filluar sa më shpejt negociatat”.
Pas ambasadorëve të SHBA dhe BE, ka reaguar edhe ambasada e Britanisë së Madhe në vendin tonë. Ambasadori Duncan Norman thotë se Këshilli Politik u krijua për të sjellë në Shqipëri një reformë zgjedhore gjithëpërfshirëse, në përputhje me kërkesat e ODIHR-it. Ai thekson se sot është dita për ta vënë popullin e Shqipërisë të parin, dhe për të gjetur dakordësinë e nevojshme për të çuar vendin përpara.
