Një ditë më parë, kryeministri Edi Rama dhe kryetari i PD, Lulzim Basha, u janë rikthyer përplasjeve me njëri-tjetrin në distancë. Shkak është bërë plani me 5 pika i PD për të rimëkëmbur ekonominë e vendit, duke trazuar kështu ujërat politikë mes selisë rozë dhe selisë blu, kur vetëm 6 muaj na ndajnë nga zgjedhjet parlamentare të 25 prillit.
Në këtë përballje është përfshirë edhe presidenti Meta, i cili ka sulmuar drejtëpërdrejtë kryeministrin Rama.“Profeti i kokoshkave t’i lërë batutat bajate, dhe të respektojë çdo pikë e presje të Marrëveshjes Historike të 5 Qershorit”, shkruante ndër të tjera kreu i shtetit.
Siç duket, presidenti Ilir Meta në ethet elektorale, po përdor çdo mjet për të kërcënuar qeverinë Rama. Sot në orën 12:00, Meta ka paralajmëruar një konferencë për shtyp. Ende nuk dihet se çfarë do të diskutojë me mediat.
