Analisti Andi Bushati ka komentuar situatën politike në vend, duke u ndalur tek përplasja mes qeverisë, opozitës dhe Presidentit të vendit pas zgjedhjeve lokale të 30 qershorit.
Bushati tha se dorëheqja e presidentit do ishte një vendim i arsyeshëm, pasi sipas tij në këtë lloj arkitekture shteti, roli i tij është inegzistent.
“Nuk do të ishte mëkat që Meta të jepte edhe dorëheqjen dhe të ikte vetë. Presidenti në këtë lloj arkitekture shteti del një kukull e pakuptimtë. Duket sikur Meta është i pavend atje dhe mund të ishte e udhës një lëvizje politike si dorëheqja dhe më pas largimi. Presidenti çfarëdo veprimi që të bëjë, këto bëjnë sikur nuk ka ndodhur asgjë. Ka një optikë tjetër, e cila ka zgjedhur ndoshta Ilir Meta dhe ajo ka të bëjë me rezistencën deri në fund me deklarata publike dhe me dekrete. Meta është një barrikadë për Rilindjen shumë më e madhe sa e gjithë opozita e marrë së bashku”, deklaroi Bushati.
I pyetur se a mund të ekzistojë një plan për komplot ndaj Presidentit të Republikës nga dy partitë kryesore në vend, PD dhe PS, analisti thotë se politika aktualisht është në një lojë të fortë shantazhesh dhe presionesh dhe palët po presin me padurim se cili do të tërhiqet i pari nga “beteja” e nisur.
“Po përflitet shumë, por për të kuptuar vërtetësinë e thashethemit unë kam gjithmonë një strategji pasi analizoj gojët që përhapin këtë thash e them. Po të shohim, gojët që e kanë publikuar këtë konspiracion në publik janë të njëjtat gojë që kanë mbështetur Edi Ramën në kohën e tij më të keqe. Politika bën shantazh me lojën e dhunës e të forcës se kush do ta hajë presionin dhe kush do të tërhiqet i pari”, tha ai.
Bushati foli edhe për përgjimet e kryeministrit të Maqedonisë së Veriut, Zoran Zaev, të kryer nga dy komedianë rusë, ku ndër të tjera bisedohej edhe për çështjen e kufijve Kosovë-Serbi.
“Na treguan shumë gjëra të reja. Së pari vërtetuan atë shprehjen tonë “kur të vjen e keqja hapi derën”. Thelbi i saj na tregon një gjë: Merkel ka qenë e shqetësuar për aventurën Thaçi-Vucic-Rama për aventurën e kufijve në Ballkan. Liderët kryesorë të rajonit janë të trembur me këtë aventurë, e cila mund të çonte në luftëra të reja në Ballkan”, u shpreh analisti i njohur.
