Nën moton “Për Republikën; Për Kushtetutën; Për Kombin; Për unitetin e popullit”, presidenti Meta fton të gjithë qytetarët që të bëhen bashkë në protestën e 2 marsit, ndërsa një kërkesë e cila të ngjason me një ultimatum vjen në drejtim të Policisë së Shtetit.
“Punonjësit e Policisë së Shtetit, nuk janë të ftuar të marrin pjesë në këtë manifestim, ndërkohë që Presidenti i Republikës, kërkon nga ana juaj që të merrni masat respektive për garantimin e rendit dhe sigurisë publike në datën dhe orarin e njoftuar”, shkruan Meta.
Ndryshe nga kërkesat që dërgohen në Policinë e Shtetit, për marrje leje për organizim tubimesh, protestash e manifestime në vend, presidenti Meta nuk e ka bërë një gjë të tillë.
Meta informon policinë të marrë masat për garantimin e rendit dhe sigurisë publike më 2 mars, në orën 17:00, ku do të zhvillohet ‘besëlidhja’ mes tij dhe popullit shqiptar. Aty pritet që Kreu i Shtetit të firmosë ‘dekretin e parë për çmontimin e grushtit të shtetit’.
Meta bën lëvizjen e radhës, paralajmëron dekretin kundër grushtit të shtetit
Duket se mesazhet e koduara që ka parashtruar më herët Meta, kanë qënë në kuadrin e protestës. Atë që paralajmëroi më parë për nisjen e një lëvizje si ‘pranvera arabe’ më 2 mars, Meta shprehet se do të nis pranvera kuqezi, ndërsa fton qytetarët të mbajnë në duar lule mimoza të freskëta dhe flamuj kombëtarë.
“Qytetarët janë ftuar të kenë me vete flamuj kombëtar dhe buqeta me lule mimoze të frekëta që paralajmërojnë ardhjen e pranverës Kuq e Zi për të gjithë shqiptarët e bashkuar kudo janë”, citon ndër të tjera Meta.
Meta shprehet se efektivët nuk janë të ftuar të marrin pjesë në këtë manifestim, as politikanë apo ushtarakë aktiv. “Në këtë organizim do të mbajë fjalën e tij Presidenti i Republikës, Sh.T.Z. Ilir Meta dhe personalitete të spikatura publike që dëshirojnë të përcjellin mesazhe, frymëzuar nga motoja e këtij manifestimi, por jo politikan, dhe as ushtarakë aktivë”.
