Policia e Shtetit njofton se janë arrestuar 4 të rinj në qytetin e Korçës, pasi janë kapur me lëndë narkotike në makinë. Edhe pse të kapur në Korçë, trej prej tyre janë me banim në Xhafzotaj ndërsa njëri nga Tirana.
Sipas policisë, të rinjve u është ushtruar një kontroll në makinë gjatë hyrjes në qytetin e Korçës. Gjatë kontrollit atyre u është gjetur një sasi prej 4.6 kg lënde narkotike e dyshuar si kanabis.
Njoftimi i policisë:
Korçë
Specialistët për Hetimin e Narkotikëve në Drejtorinë Vendore të Policisë Korçë, bënë arrestimin në flagrancë të shtetasve:
A.J., 27 vjeç, banues në fshatin Xhafzotaj, Shijak.
B.J., 32 vjeç, banues në Xhafzotaj, Shijak.
H.U., 24 vjeç, banues në Xhafzotaj, Shijak.
E.T., 28 vjeç, banues në Babrru, Tiranë.
Arrestimi i tyre u bë pasi, nga informacione të siguruara në rrugë policore, si edhe gjatë kontrollit që shërbimet e Policisë kanë ushtruar në hyrje të qytetit të Korçës, në mjetin tip “Peugeot”, me drejtues shtetasin E.T., me të cilin këta shtetas po udhëtonin, iu gjet dhe sekuestrua në cilësinë e provës materiale 4,6 kg lëndë e dyshuar narkotike kanabis.
Materialet i kaluan Prokurorisë pranë Gjykatës së Shkallës së Parë Korçë për veprën penale “Prodhimi dhe shitja e narkotikëve, kryer në bashkëpunim”.
