Pesë persona janë arrestuar sot në Itali, pasi dyshohen të jenë pjesë e një bande të trafikut të lëndëve narkotike në Verona.
Sipas mediave italiane, grupimi përbëhej nga shqiptarë, serbë dhe italianë, ndërsa në pranga kanë rënë 4 shqiptarë të moshave midis 35-50 vjeç dhe një 36-vjeçar serb. Policia dyshon se grupimi kriminal trafikonte drogë në zonën e Veroneses ku edhe jetonin.
Së bashku me të arrestuarit janë hetuar edhe 16 persona të tjerë. Sipas policisë, hetimet për këtë operacion kanë nisur që në muajin shkurt të vitit 2016.
Gjatë kontrollit në banesë, policia ka sekuestruar më shumë se 177 kilogramë marijuanë dhe 1.7 kilogramë kokainë. Në operacionin e zhvilluar u prangosën edhe 7 të tjerë në kushtet e flagrancës.
