Detaje të reja janë zbardhur sa i takon atentatit ndaj Edison Begajt nga një person i veshur si efektiv. Burimet paraprake, ende jo zyrtare, thonë se në Lushnje është gjetur një makinë e braktisur në një kanal, që dyshohet se mund të jetë e autorëve. Brenda saj është gjetur një uniformë policie, e ngjashme me atë që kishte veshur autori i atentatit.
Aktualisht, Policia e Vlorës nuk ka asnjë të ndaluar për atentatin, ndërkohë që Begaj ka dalë jashtë rrezikut për jetën, pasi plagët i ka marrë në pjesën e poshtme të trupit. Edison Begaj është një emër i skeduar nga policia e Vlorës edhe më herët, si i përfshirë në trafikun e lëndëve narkotike.
Ngjarja
Edisoni ka qenë duke hapur portën e banesës së tij, dhe në makinë ka qenë me dy fëmijët. Një person i maskuar dhe i kamufluar me rroba policie ka shtënë me armë ndaj Edison Begaj, i cili ka mbetur i plagosur.
Ka qenë ora 23:20 të datës 29 maj, ku është shtënë me katër plumba ndaj 38-vjeçarit Edison Begaj, i cili mbeti i plagosur.
Autori ka qenë i fshehur mes ullishteve të Kaninës, duke pritur 38-vjeçarin. Ai po qëndronte në këmbë dhe pasi ka qëlluar nga 3 metra largësi Edison Begajn, është larguar po në këmbë nga vendi i ngjarjes. Më pas është marrë nga një automjet në gjysmë të rrugës dhe është larguar. Policia i është vënë menjëherë nga pas në ndjekje, por autori ka mundur të shpëtojë.
