Familjarët e Mateo Vasiut dhe qytetarët janë zhvendosur në qendër të qytetit, pas Gjykatës së Fierit. Me thirrjet ‘varje, varje’, qytetarët kanë marshuar deri në qendër të qytetit, duke u kërkuar personave të tjerë që të firmosin peticionin, për varjen e Klodian Çalamanit.
Drejtuesit e mjeteve kanë ndaluar, që të firmosin peticionin kundër monstrës që vrau dhe groposi 8-vjeçarin Mateo Vasiun.
Familjarët e 8-vjeçarit Mateo Vasiu, kanë nisur mbledhjen e firmave, duke kërkuar mbështetje nga qytetarët që autori të dënohet me vdekje. Kjo nismë është mbështetur menjëherë nga të pranishmit, ndërsa në kor qytetarët kanë thërritur: Të varet!
Vrasësi tregoi më herët çfarë kishte ndodhur, dhe mënyrën si e kishte kryer krimin. Por avokati Ermal Ahmataj, ka përcjellë të tjera të dhëna shokuese.
Ai foli në emisionin “Me Zemër të Hapur”, për vrasjen e 8-vjeçarit Mateo Vasiu, teksa ka treguar detaje të tjera tronditëse nga dëshmia e autorit të vrasjes. Klodiani ka thënë se nuk ka pasur benzinë, pasi do ta kishte djegur, për të mos e gjetur kurrë trupin.
Ermal Ahmataj gjithashtu u shpreh se një tjetër avokat, është caktuar për 38-vjeçarin, Klodian Çalamani. “Ka disa të dhëna që kanë dalë nga grupi i hetimit. Mësohet se ai ka thënë se nuk kisha benzinë, se po të kisha benzinë ju nuk kishit për ta gjetur kurrë djalin. Dua të them se Gjykata e Fierit ka caktuar “arrest me burg”, por kjo masë sigurie ndryshe nga çdo masë tjetër u bë në mungesë të autorit.
Është caktuar një avokat tjetër për çështjen e Klodian Çalamanit. Besoj se kjo ka qenë zgjedhja më e mirë nga situata e Prokurorisë dhe policisë, pasi do të kishim një situatë të paimagjinueshme nëse do të paraqitej në gjykatë”, ka thënë më tej ai.
