Gazetari Robert Rakipllari ka folur rreth situatës në të cilën gjendet qyteti i Durrësit, pas tërmetit të 26 nëntorit.
I ftuar në studion e “Opinion” në Klan Tv, Rakipllari deklaroi se Valbona Sako dha dorëheqjen pasi ishte kundër shembjes së pallateve pa u marrë prova në to.
Sipas gazetarit, bashkinë e Durrësit tashmë e drejton ish-kryebashkiaku Vangjush Dako. Ai shton se Dako ka shkuar në bashki për të fshehur gjurmët e tij në lidhje me ndërtimet.
“Një shenjë e keqe që unë mendoj se nuk do ketë arrestime dhe përgjegjësi penale, por propagandë. Sipas informacioneve që unë kam, nuk jam i sigurt 100%, kryetarja e Bashkisë së Durrësit, dha dorëheqjen sepse ajo kërkoi që këto pallate të mos shembeshin po të shkonte Prokuroria dhe më pas të bëhej ajo gjë. Përkundrazi ajo u largua, dhe tani bashkinë e ka marrë Vangjush Dako, duhet të themi të vërtetën.
E ka marrë ai sepse nënkryetari i bashkisë që sot qeverisë bashkinë e Durrësit, është një njeri i emëruar nga Dako dhe praktikisht bashkinë e Durrësit e qeverisë Dako. Ai ka shkuar atje dhe po fsheh gjurmët e veta se ka 12 vite në këtë histori dhe është kompani betoni ka dhënë leje etj. Ne shohim që jo vetëm që prokuroritë shqiptare nuk kanë hetuar korrupsionin, por në këto moment nuk e di sa fuqi ka që të hetoj korrupsionin e qeverisë aktuale”, tha ai.
